少少有關《狂舞派3》嘅觀後感
-
睇《狂舞派3》，
係初八星期五晚嘅時候。
-
完場之際，黃修平導演有嚟謝票，而因為係特別場嘅關係，在場嘅都係傳媒或者影評人，但謝票竟然喺大概一兩分鐘之內就完咗，並無任何在席觀眾發問問題，呢個可能係我第一次遇到咁嘅情況。
-
究竟係因為夜已深嘅關係(超過咗12點要趕車)，定係咩原因? 其實就連我自己，喺當下幾十秒嘅時間之內，都諗唔到有咩可以問，散場之後，我開口嘅第一句說話係[《狂舞派3》係一套難入口嘅電影。]
-
所謂嘅難入口，並唔係話佢嘅故事或者表達形式好似《天能》咁難理解，要反覆去睇，吸收好多資訊先可以[睇得明]，相反嘅係套戲其實極其簡單，但如果你唔將套戲擺喺電影傳統脈絡，香港電影大環境、香港社會，導演作品嘅軌跡，甚或係全個世界潮流去觀照，其實你未必會覺得《狂舞派3》係優秀嘅作品。
-
沉澱咗一整日，終於喺啱啱沖涼嘅時候諗到應該點樣講套戲，點樣有角度去講，因為《狂舞派3》嘅評論係極容易墮入陳腔濫調嘅陷阱，而我亦相信電影嘅評論會係兩極。
-
未出影評，先講判斷，《狂舞派3》係一套各方面都極具顛覆性嘅作品，隱含咗創作人無比嘅勇氣，擺喺高先電影院做首映頭炮，更加具有好強嘅時代意義。但電影要比耐性去睇，睇完要諗嘢，諗唔明，過幾日嚟我度睇影評，包保你會對電影有新嘅睇法。
-
開畫第一個星期日，戲院要人。
Search